Wednesday, June 18, 2008

¿Sera d'esta vez?

L'Auditoriu Príncipe Felipe d'Uviéu, va acoyer esti sábadu 21 de xunu'l Congresu Fundacional de la coalición electoral Unidá, nel que se dará anuncia de la so tresformación en federación de partíos, recuperando'l nome d'Unidá Nacionalista Asturiana (UNA).

La coalición, formada nesti momentu por Izquierda Asturiana (IAS), Andecha Nacionaliega, delles agrupaciones locales ya independientes, tresfórmase d'esta miente nuna federación de partíos, lo que supón la creación d'una estructura orgánica conxunta con unos estatutos que serán aprobaos nel Congresu Fundacional.

La nueva UNA defínese como "la espresión política organizada del nacionalismu asturianu d'izquierdes que, dende un plantegamientu de pluralidá y xuntura, tien vocación d'axuntar a les persones y corrientes ideolóxiques y polítiques que comparten los mesmos oxetivos", al tiempu que cuenten con "construir d'una vez por toes el necesariu referente d'una izquierda que piense y actúe en clave asturiana, que tenga una presencia que rescample na vida política del país y seya a llevantar una voz que se sienta y que permita la espresión d'una corriente política tan necesaria como ausente nesti momentu del panorama políticu asturianu".

La Xunta Executiva Nacional, que s'espera seya aprobada por un ampliu consensu al que se llega dempués d'una llarga negociación ente toles partes integrantes, tendrá de poner en marcha la so cadarma organizativa a lo llargo'l branu; organizando nueves agrupaciones y venceyando a tolos sectores que durante'l más d'un añu de camín de la coalición dexaron amosada la so simpatía y reclamada la construcción d'un frente políticu asturianu estable, fuerte ya influyente.

http://www.asturies.com/noticia.php?cod=30037

1 comment:

Cuál ye´l futuru de l´asturianismu? said...

Amás hai convocáu un congresu del PARTÍU ASTURIANISTA pa esti sábadu 28 xunu col lema «CADA VEZ MÁS NECESARIOS».
(http://www.union.asturianista.as/)

Quiciabes sedría lo meyor que la UNA y el PAS tornaran (esta vegada tamién cola URAS) axuntase.

PUXA ASTURIES!!
Un saludu