LA FSA ya'l PP ya mesma MIER..A son:

Fernando Lastra: «La oficialidá diba xenerar un gran conflictu»
18 d'avientu de 2008
Fernando Lastra fala, nesta entrevista n'esclusiva a LES NOTICIES, mui claro. Espón les sos razones poles que nun ta a favor de la oficialidá de la llingua asturiana, al tiempu que reconoz que «ensin dulda» habría que facer más pola promoción del so usu ente la ciudadanía. Agora bien: el límite que pon -que pon el so partíu- ye'l reconocimientu de derechos.

A Fernando Lastra tán acabante concede-y l'antigallardón de los Premios Andrés Solar de la Xunta pola Defensa de la Llingua pola so posición contraria a la oficialización de la llingua asturiana. Otra manera, l'entrevistador comprobó la inmensa y preocupante distancia que sigue esistiendo ente los foros d'opinión asturianista y l'establishment asturianu.

XUAN BELLO
Una posibilidá, que considero probable, ye que'l PP gane les elecciones autonómiques nes prósimes elecciones con posibilidaes de formar gobiernu. ¿Contémplenla ustedes?

Non. Una conxetura d'esa clas simplemente nun se contempla. L'análisis políticu llévanos a otres consideraciones. La posibilidá de que'l to oponente tenga un ésitu electoral nunca se descarta, pero'l trabayu políticu tien como oxetivu fundamental vencer pa poder poner en marcha'l to proyectu políticu. Una fuerza política como'l PSOE nunca piensa en perder les elecciones.

Yo preguntába-ylo dende estes consideraciones: el PSOE lleva n'Asturies años nel poder, lo que supón un seriu desgaste, y, amás, la fuerza política na que s'apoya pa gobernar, Izquierda Xunida, tien un futuru políticu más bien inciertu.

Yá, pero lo qu'hai que preguntase ye si les fuerces polítiques de la esquierda tienen les respuestes a les preguntes que se tán plantiando nel sen de la sociedá. Esta cuestión sí que merez una reflexón bien fonda. ¿Cuáles son los caminos que tienen que recorrer los partíos d'esquierda pa da una respuesta a esta pregunta? Camiento qu'esto ye lo que preocupa a la xente. Los partíos, amás de preocupase por ganar les elecciones, tienen que preocupase en pa qué tienen que ganar les elecciones. Eso ye'l cometíu más importante que tenemos per delantre. Tenemos qu'atopar les respuestes a les preguntes que surden día a día. La crisis económica y financiera va determinar que'l mundu sía distintu depués de la crisis: en tou casu sabemos que nun va ser a la manera de los que xeneraron esta crisis. Saber cómo va ser, resulta bien difícil, pero fairíamos muncho bien en dedicar una parte de l'acción política a la reflexón. Tenemos una responsabilidá sobre l'acción, porque gobernamos, pero tien qu'haber tamién una reflexón sobre'l «qué facer». Les preguntes que fai la realidá anguaño son distintes a les que facía ayeri mesmu.


Toi d'alcuerdu na necesidá de que la esquierda busque eses respuestes. La ciudadanía asturiano, con too y con eso, debe tar perplexa. Hai unos meses ustedes consumaben cola derecha un proyectu de reforma estatutaria y apocayá llegaron a un alcuerdu con Izquierda Xunida pa formar gobiernu

Eso tien que tener una esplicación. Y la esplicación tien que ser menos teórica, más concreta. Cuando s'esixe una teorización sobre una situación concreta, en política nun se llega a nada. ¿Qué tábemos discutiendo con relación al Estatutu? Nós, cuando llegamos a la reforma del Estatutu, sabíemos lo que queríemos facer: una reforma del Estatutu vixente y que se siguiera un determináu principiu doctrinal. Planteámonos cambiar del Estatutu vixente, que funciona razonablemente bien al nuestru xuiciu, aquello que mereciera la pena cambiase. Yera una reforma, non un Estatutu nuevu. Nun teníemos un planteamientu nuevu sobre la cuestión esencial, identitaria, d'Asturies que mereciera la pena trabayar sobre ella. Esi nun yera'l nuestru planteamientu. Izquierda Xunida sí tenía un planteamientu d'esta clas y esto separónos d'una manera radical. Esi nun yera'l nuestru planteamientu. Eses respuestes yá les considerábemos daes. Tábemos falando de l'arquitectura político-alministrativa d'Asturies, qué funcionaba y qué non.

Perdóneme la maldá: el PSOE y el PP compartíen nesti asuntu'l nun querer reformar l'Estatutu.

Non, nun ye verdá, queríemos reformalu. Nun hai que buscar equí tacticismos que lleven a la melancolía. Queríemos reformalu y reformalu rápidu. Nun queríemos dar munches vueltes, nun queríemos marear a la ciudadanía cola definición esencial d'Asturies. Nun queríemos dicir a los ciudadanos que tábemos dispuestos a abrir una reflexón sobre la esencia d'Asturies porque simplemente nun queríemos debatir una cuestión que dábemos y damos por debatida. Ye verdá qu'otres fuerces polítiques -parlamentaries y extraparlamentaries- podíen pensar que yera'l momentu de pensar lo que somos, redifininos... Puede. En tou casu, esa nun yera la nuesa reflexón. Nós tábemos más pendientes de frenar dalgún aspectu negativu del debate qu'había daquella sobre'l Títulu VIII de la Constitución, de la conformación del Estáu de les Autonomíes. Preocupábanos sobre manera'l conflictu que se suscitara especialmente en Cataluña que provocara un gran desconciertu ente los ciudadanos. Aquel debate forzara posiciones en contra de la profundización nel Estáu de les Autonomíes. Toos yéramos conscientes de qu'esi debate, que yera un choque mui fuerte ente dos concepciones nacionalistes, taba impidiéndonos tener una reflexón serena sobre esti tema. D'un llau taben los nacionalistes catalanes, del otru los nacionalistes españoles: yera un choque nel que nun había beneficiarios, especialmente ente los que nun siendo siendo nacionalistes nun atopábemos espaciu pa proponer un debate sensatu. Too taba trufao de mezquindaes: dicíen que taben discutiendo del autogobiernu cuando de lo que falaben yera de perres. Dicíen que falaben d'autogobiernu y lo que discutíen en realidá yera de cuestiones identitaries. Nun son lo mesmo les cuestiones identitaries que l'autogobiernu. Ye verdá que van de suyo y que unes van detrás de lo otro; pero daquella pa los socialistes la estructura xeneral y la importancia del Estáu nun taba en cuestión. Nós defendemos la idea d'un Estáu fuerte. L'Estáu de les Autonomíes ye lo que ye -la descentralización, el federalismu- pero non el confederalismu nin la esnembración de territorios. La nuestra idea ye la de la cooperación...


El confederalismu tamién precisa, pa sustentase, un Estáu fuerte...

Sí, pero parte d'una idea distinta. L'Estáu confederal esixe la previa esistencia d'estaos distintos.


¿Nun tienen mieu qu'Asturies quede nuna situación secuandaria por falta de ferramientes alministratives?

Nun tenemos mieu d'eso porque nun ye verdá qu'Asturies tenga menos ferramientes qu'otres comunidaes. Si ún analiza los instrumentos d'autogobiernu, y les posibilidaes de dir a más, la discusión ciertamente cambia. Faise más técnica, más práctica, más entendible. Dende esa perspectiva pueden dase respuestes en términos precisos. La respuesta mía ye qu'Asturies nun queda ensin instrumentos alministrativos d'autogobiernu. Al contrario de lo que pensaba IX, tenemos toles competencies que podemos tener. Toles competencies que dende una óptica política sensata teníemos que tener, tenémosles. Pue dicime usté: sería conveniente asumir la competencia de la xestión de los ferrocarriles que pasen namás per Asturies, concretándola nuna tresferencia. Bueno, vamos a discutilo. ¿Merez la pena que los Ferrocarriles del Principáu sían la llinia que va de Xixón-Col.lanzo? ¿Tenemos una economía d'escala que nos permita tener unos ferrocarriles en manes nuestres y les llinies Xixón-Madrid n'otres? Yo creo que la descentralización ye a cencielles un asuntu d'eficiencia del Estáu a la hora d'emprestar los servicios públicos. Y si se confunde eso, lo que nos metemos ye nuna presunta discusión sobre'l fueru y lo que ta discutiendo en realidá ye'l güevu. Planteaba IX na reforma que los asturianos teníen que tener un decálogu de derechos propios. Pues ehí hai un problema doctrinal: los derechos de los asturianos nun pueden ser distintos de los derechos de los españoles. Tamos falando de los derechos constitucionales. Nengún español puede tener un derechu que nun tengan los otros. Nun pueden tener unos derechos los asturianos y otros los llioneses. Lo demás será otra cosa: serán principios informadores de polítiques públiques. Y ehí ta la discusión: si ye un derechu o un principiu informador d'una polítiva pública. Si ye un principiu informador d'una política pública, nun ye un derechu. Contevertiráse en derechu cuando'l lexislador ordinariu regule esi principiu informador.


Alvierto delles contradicciones nesi discursu. L'Estáu español tien firmáu col Conseyu d'Europa una Carta de les Llingües Minoritaries, qu'inclúi expresamente a Asturies, a la llingua asturiana y al gallegu-asturianu. El Conseyu d'Europa, mediante un informe, ta acabante avisar al Gobiernu español que los ciudadanos asturianos nun gocen d'unos derechos llingüísticos que sí s'esfruten nel restu del Estáu.

Ye una opinión del Conseyu d'Europa que yo matizaría. Yo nun duldo que se puedan facer más coses pola llingua asturiana. Nun lo duldo. Amás, dígolo claramente: si se pueden facer más coses, hai que facer más coses.

Insisto na impresión que tengo de que'l PSOE y el PP nun queríen reformar l'Estatutu, que lo víen equí n'Asturies como una resaca inercial de lo que taba sucediendo nel Estáu. Munchos ciudadanos, sicasí, consideraron que yera una bona oportunidá pa introducir la oficialidá de la llingua asturiana.

Esi ye un tema quese plantea siempre. Hai una inquietú social nesi sen y siempre que se plantea una reforma estatutaria discútese sobre ello. L'oxetivu de la reivindicación ye la modificación del artículu 4u y el reconocimientu de la oficialidá. ¿Por qué se plantea esto? Por una razón: la oficialidá ye un asustu estatutariu; quier dicise, a la oficialidá de la llingua namás se puede acceder al través del Estatutu. Tolo demás sería desarrollu del Estatutu. Abiertu'l debate de la reforma apareció esi tema con mayor notoriedá qu'otros (anque tamién hubo dalgunos especialmente delicaos). Hubo, como se sabe, polémica. El casu ye que les dos fuerces mayoritaries (yo falo pola mía, el PSOE) nun yeren partidaries de que l'Estatutu incorporara la oficialidá. Da-y al asturianu'l rangu d'oficialidá nun ta dientro de los nuestros presupuestos ideolóxicos. Nun compartimos esa posición que sí defendió IX. Sí ye verdá que'l vixente Estatutu implica ciertu desenvolvimientu lexislativu, pero un desenvolvimientu limitáu pol artículu 4u. Lo que desenvuelve ye l'usu y la promoción, non la oficialidá. L'usu y promoción regúlase con mayor o menor fortuna. Hai una llei en vigor de la que se podrá falar si s'aplica con tola so intensidá o menor. Pero esa ye la realidá xurídica.

¿Usté piensa realmente qu'Asturies se pue permitir nun planificar la política llingüística d'equí a venti años de manera que la llingua asturiana y el gallegu-asturianu puedan perdurar como realidaes sociales? ¿Nun se trata de preservar p'Asturies, pa España y pa Europa un bien cultural y social como ye l'asturianu?

Ta faciéndome una pregunta que nun tien nada que ver colo xurídico. La respuesta que-y puedo dar ye que deberíamos facer más. Ye igual que si me pregunta pol prerrománicu. Nun quiero falar en términos antropolóxicos, sinón en términos xurídicos.


Sí, pero cuando me fala que'l «límite de la promoción y usu» ye la oficialidá, nun me ta diciendo nada, puesto que la oficialidá de la llingua puede entendese de mui distinta manera.

Yo lo que trato ye d'estremar campos. Un escenariu con oficialidá y otru sin oficialidá son mui distintos. Nel primeru hai un reconocimientu a los ciudadanos de cómo s'utiliza xurídicamente una llingua oficial. Ye mui distintu.


Sí. Pasaríamos d'una situación de conflictu llingüísticu a otra d'alcuerdu llingüísticu.

Yo nun soi tan optimista como usté. Entiendo lo que me plantea: ¿por qué'l conflictu va dir más allá d'una mera discusión racional? ¿Por qué nun va a ser asina si les persones, polo menos teóricamente, les defenden persones sensates y lúcides? Yá, pero yo faigo política. Sí, ehí ta la sociedá catalana, la sociedá belga. El problema ye quien controla depués les acciones d'individuos que consideren que tienen un derechu (y puede que lo tengan, si-yos lu reconocemos xurídicamente). Nun soi tan optimista como usté: la oficialidá acentuaría'l conflictu. Nun tengo nenguna razón pa ser optimista nesti tema. Nun creo qu'esti conflictu vaiga resolvese en términos racionales. Nun quiero ser esquemático, esto que digo necesitaría de munches aclaraciones

Actualmente l'asturianu yá tien un reconocimientu oficial. L'artículu 4u y la Llei d'Usu y Promoción podía entendese xurídicamente como una forma d'oficialidá.

Claro. Si la nuestra posición política nun ta a favor de la oficialidá, nun podemos por coherencia facer un reconocimientu explícitu de la oficialidá. El Tribunal Constitucional reconoz que puede haber una oficialidá de facto. Yo nun toi d'alcuerdu. Por eso nun soi partidariu de facer determinaes coses con esti marcu llegal. Yo nun soi partidariu nin siquiera d'una oficialidá de facto, salvo que lo sía de iuris. Si'l parlamentu la aprueba, yo la asumiría y aceptaría, pero creo que tienen que dir a la par. Entiendo qu'haiga xente qu'exponga les condiciones del Tribunal Constitucional y diga: tamos énte una oficialidá de facto; ehí vien la nuestra reflexón: ¿si nun somos partidarios de la oficialidá xurídica, cómo vamos ser partidarios de la oficialidá de facto? Nesti sen, hai que desenvolver estrictamente lo que diz l'Estatutu: l'usu y la promoción. Yo nesti tema nun me muevo en términos académicos. Tengo una actitú comprensiva con cualquier explicación que se me dea sobre esti tema. El mio únicu límite ta nes cuestiones que planeen violencia o atenten contra la dignidá de les persones. Dalquién puede dicime que quier ser independiente o qu'él quier vivir solu en monte; yo entiéndolo, otra cosa ye que comparta eses idees. La mio responsabilidá ye política: nun ye académica nin antropolóxica. Nesi casu nun puedo da-y una respuesta que vaiga más allá d'esto. Diba ser una hipocresía de la mio parte.

¿Nun se ven na FSA como los últimos mohicanos na defensa d'una idea estrictamente xacobina del Estáu?

Non, nun nos veo asina. Sinceramente, creo qu'hai más sintonía ente'l PSOE estatal y la FSA de la que dalgunos círculos suponen. Entiendo que se reciba con alegría y esperanzanza dalgunes resoluciones congresuales, como ocurrió cuando el PSOE impulsó una enmienda en favor de la diversidá llingüística d'España. Esto referíase namás a les llingües oficiales.


Sían o non les llingües oficiales, l'Estáu tien una responsabilidá sobre elles...

Efectivamente.

Un asturiano falante, ¿nun tien los mesmos derechos qu'un castellano falante?
Non. Xurídicamente non.

¿Quier dicir que mio buela, que namás fala asturiano, tien menos derechos que dalquién que fale castellano?
Non. Tien los mesmos derechos. Lo que pasa ye que cuando fale cola alministración necesariamente tendrá que falar en castellano. ¿Ye eso una merma de los sos derechos? Ye un condicionante. Simplemente tien que falar en castellano.

¿Y si nun puede?
Tien que poder.
Hai munchos militantes del so partíu, inclusive representantes electos, que tienen dificultaes pa espresase en castellano.

Sí pueden. Tienen que poder. Les obligaciones son les constitucionales. Otra cosa son les comunicaciones mundanes. Hai una obligación de comunicase nes llingües oficiales. Lo mesmo-y sucerá a un británicu que viva n'Os Ozcos; pero cola alministración tendrá que relacionase en castellano.

La diferencia que yo veo ye qu'una persona d'Os Ozcos, que fala gallegu, nun tien los mesmos derechos relativos a la llingua qu'un ciudadanu que viva a venti kilómetros, en Galicia, onde'l gallegu ye oficial
Pregúnto-y yo: ¿qué derechos nun-y xenera a ún d'Os Ozcos que sí tenga un gallegu?

Un gallegu puede recibir escolarización na so llingua, dispón de medios de comunicación públicos en gallegu, puede falar en gallegu con una alministración que tamién-y fala en gallegu, etc. etc. Creo qu'ehí sí tienen ustedes una contradicción.

Yo nun quiero salime de la argumentación xurídica. El casu ye que n'Asturies la mayoría decidió esta situación que tenemos y nun hai otra. A mi nun me gusta la hipocresía. Digo lo qu'hai. De la mesma manera que siempre me fastidió'l profesor enrolláu, fastídiame la posición del tolerante que piensa que tien dalgo que nun-y da al so oponente. Yo si tengo dalgo, doilo; pero si nun lo doi, porque nun lo tengo, nun lo doi. Nun puedo permitime esa condescendencia, pa eso hai xente con menos responsabilidaes nel partíu. Entiendo que nun sía simpático. La Xunta pola Defensa de la Llingua unvióme una carta na que me daben el «madreñazu» y pidíenme que lo recibiera con deportividá. Con deportividá recibí esi xestu que nun me pareció agresivu, sinón coñón, y gastando la mesma retórica qu'ellos conteste-ys. Nun voi dir a recoyer esti antipremiu por problemes d'axenda. Entiendo que ye una crítica amable y elegante, anque seguramente más agria de lo qu'aparenta.


¿Y nun cree usté que yá ye hora de superar conflictos y esplorar víes d'alcuerdu pal tema llingüísticu?

Yo falo poquísimo d'esti asuntu. Cuando llegó'l debate del Estatutu, les úniques declaraciones que fixi fue lleer el testu que s'alcordara ente'l PSOE y el PP. Nun entré nos debates anteriores, nin siquiera cuando'l PP parecía que coquetiaba cola posibilidá de facer oficial la llingua. Nun dixi públicamente un vierbu, nun polemicé con esti asuntu. Yo nun me meto nello. Creo que los responsables culturales tienen que dicir muncho nesti asuntu. Yo nunca fui a poner una tacha porque se destinaran fondos públicos pa la promoción y usu del asturianu. Cuando hai cuestiones de fondo, discútense, claro. Si se necesiten fondos pa política llingüística, que los pidan; si se necesiten persones qu'impulsen eses polítiques, que les busquen. Yo nun m'opongo. Si se decide qu'hai que da-ys más prioridá, que se-ys dea. Nun sé qué diba facer yo si fora'l responsable, pero'l casu ye que nun lo soi. Lo cierto ye que nel tema del asturianu yo intervine na llectura del testu que se proponía. Namás. Contesté a la Xunta pola Defensa de la Llingua con una carta irónica. Agradezo la comunicación que me fixeron en tanto y cuanto me fai llegar una inquietú de la ciudadanía, inquietú que ciertamente nun comparto.



http://www.lesnoticies.com/